Status

عدينا النهاردة من جمب المديرية ” مكان التفجيرات ” ,, والجدير بالذكر إنه كان أشبه بمولد على خلفية مبنى واقع !! بس كدا ..
الناس بتتمشى وبتصور وبتأزز لب و في ناس بتبيع اعلام وصور للسيسي !!
وفي عائلات هناك وناس بتبيع بليلة !!
بصوا المكان هناك رائع فعلا و مناسب للتنزة
وفي شوية بنات لطيفة واقفين يهتفوا الموت للأخوان !
يعني الجو هناك يخليك تحس بحاجة مش عارفة أوصفهـــا
على خلفية 13 ماتوا واكتر من 130 اتصابو في ناس بتبيع عسلية !!

‫#‏المصري_اللي_على_حق‬ ‫#‏ميقولش_للسبوبة_لا‬ !!

Advertisements

#عيد_ميلادي_وكدا !!

Status

حين بلغت العشرين عاماً إنتابني شعور أن عمري قد فات منه النصف ,, فأسرعت الخطى ..
وفي الأيام الخمسة التالية بلغت الخامسة والعشرين !! ,, حين ألتفت أكتشفت أن الخمسة أعوام مضت وفقط مضت !!
في العشرين كنت أشعر أن الدنيــــا تلحق بي واليوم أنا أركض ورائهـــا .. في العشرين كنت أملك كل شئ ولا شئ ,, واليوم ملكت روحى وكفــى

اليوم أخطوا الخطوة الأولـــى للعام الأول بعد العام الخامس والعشرين ..
اليوم يا سادة ولدت من جديد .. وسأتابع إن أعطاني الله عمراً لكن هذة المرة بخطـــى أكثر ثباتاً ..

اليوم عيد ميلادي  🙂

Status

الصبح النهاردة وأنا في الطريق للجامعة ..
بنوتة صغيرة تقريبا خمس سنين ماسكة أيد ( أتوقع ) جدهـــا لأنه كبير في السن ,, بس كانت ذي العسل وماشية تتنطط ,,
جدها بيقول لها أنا عاوزك يا حبيبتي تبقى مثقفة وتقرأي كل حاجة حتى الجرايد والورق القديم ,,, عاوز دماغك تبقى كبيرة علشان معدش يضحك عليكي ولما تقفي تتكلمي الكل يسمعلك وتعرفي تناقشي اي حد :))))))))))))

والله من فرحتي بكلامة كنت هقول له مقدرتش أمسك نفسي من أني أسمعك لكن بجد أنت راجل محترم : ) … أنا فرحانة بيه جدا بالرغم أني يدوب مشيت دقيقة جمبة !!!!

المجد لكل جدوا مثقف  🙂

Status

– الإجرة كدا يلي ورا ! .. “التباع” متحدثاً “للركاب” في الكنبة الأخيرة في الميكروباص ,,

– ” راكب” الأجرة نص جنية يا أسطى على فكرة بتاخد جنية ليه !! –

” التباع” لا هي بجنية ولو مش عاجبك أنزل – الراكب مش نازل و بلاش تتكلم !! –

” التباع ” لا هكلم و وريني هتعمل إية !!

– الأسطى يوقف العربية في نص الطريق و يبص ورا ويحصل مشادة كلامية طويللللله بين الركاب الكل يشترك فيها مع أو ضد الموقف ما عدا أنا

أنا كنت مركزة مع التباع !! بس لأنه  طفل عندة بالكتير 8 سنين !! صعب عليا أوووي كان نفسي أمسك منديل وأمسح له وشه وإيديه بدل كوم التراب اللي عليهم وأسأله إسمة إية !! تحس إنه بلطجي في جسم طفل .. منظر رجلية من الشغل توحي لك إنها رجلين راجل عندة 30 سنة .. يا ترى هيكبر ويبقى إية وهو متربي وبيشتغل كدا !!

Status

معلومة عرفتها من رواية ساق البامبو لــ سعود السنعوسي ..
بطل الرواية مواليد 1988برج العقرب ” برج مائي ” و بالتقويم الصيني تبقى سنة 4685 برج التنين والبرج دا عند الأخوة الصينين برج خشبي ,,, يبقى أنا مائي وخشبي !!
المعلومة المستفادة إني أكيد لازم بعرف أعوم !
🙂

Status

– سواق ” تورسكل ” بيقول لسواق ” تاكسي ” ( واقف لأن قدامة طابور عربيات واقفة في جيهان لأن الدنيا زحمة ) .. إتحرك إنت مش بتقف غير في الحتت الواقفة !!! ( كان نفسي أقوله لو بتتحرك مش هيقف )

– سواق التاكسي ! – في إستياء واضح من سواق التروسكل ! يعني أطير ؟! –

مواطن ماشي وماسك علبة عصير جوافة ! ومخاطبا سواق التاكسي : لا قولة ربنا ينتقم من مرسي !

– سواق التروسكل ! مخاطياً المواطن : وإيه اللي جاب سيرته الوقتي !؟

– المواطن ( و تعلو على وجهه إبتسامة مسخرة ! ) مخاطباً كلاهما : وإيه يعني !

Status

 

 

– سلمى عاوز تسيب مصر ..
– سلمى مش هتعرف تعيش غير في مصر

لأنها هي وطن لمصر ♥ !

لــ محمود الحديدي